Դասանիւթ․- Հայերէն
Նիւթ․- Կայուն/ Վերականգնուող ուժանիւթ
Տարիք․- 13-15
Պատրաստող ուսուցիչ․- Լիւսի Տօնիկեան
Ե-նամակ.- lucy.kouyoumjian@hayavant.com
Հիմնաւորում․-
➢ Ուժանիւթն է, որ կ՛աշխատցնէ մեր շուրջ գտնուող բոլոր գործիքները․ անիկա «կը բանեցնէ» ամբողջ երկրագունդը։ Ուժանիւթի համաշխարհային մեծ պահանջն ու սպառումը մէկ կողմէն եւ անոր աղբիւրներուն նուազումը միւս կողմէն, պատճառ կը դառնան որ անիկա դառնայ հիմնական առանցքը աշխարհաքաղաքական մեծագոյն
տագնապներուն։ Տարուէ տարի աշխարհի բնակչութիւնը աւելի ուժանիւթ կը սպառէ։ Մեր մոլորակին ուժանիւթ մատակարարող պահեստները ինչպէս՝ կազը, հանքածուխը եւ քարիւղը սահմանափակ են եւ վերականգնելու համար երկար ժամանակի կը կարօտին։ Իսկ անոնց չափազանցուած գործածութիւնը ապականում կը պատճառէ։ Հետեւաբար,
պէտք է նուազեցնել սպառումը վերոնշեալ աղբիւրներուն եւ զանոնք փոխարինել կայուն կամ վերականգնուող ուժանիւթի աղբիւրներով (ջուր, արեւ, հով․․), որոնք աւելի վստահելի եւ մատչելի են եւ չեն ապականեր կենսոլորտը։
➢ Այս նիւթի արծարծումը կարեւոր է պատանի աշակերտներու համար, որպէսզի անոնք անդրադառնան, որ այս ուժանիւթերուն չափազանցուած սպառումը վտանգ կը սպառնայ երկրագունդին եւ անոր միջոցով՝ մարդկութեան գոյատեւումին։ Աշակերտներուն մօտ պէտք է ստեղծել զգաստութիւն եւ գիտակցութիւն, որպէսզի հաւատան թէ իրենք կրնան քարոզչական աշխատանքներով եւ իրենց ապրելակերպը փոխելով կանխարգիլել խեղճացած եւ ապականած մոլորակ մը կտակելը գալիք սերունդներուն։
Նպատակակէտեր․-
Դասի աւարտին, աշակերտը պիտի կարենայ․-
❖ Սահմանել «վերականգնուող ուժանիւթ» յղացքը։
❖ Թուել ոչ կայուն կամ չվերականգնուող ուժանիւթի աղբիւրներ։
❖ Թուել կայուն կամ վերականգնուող ուժանիւթի աղբիւրներ։
❖ Բաղդատել երկու տեսակի ուժանիւթի աղբիւրները։
❖ Թուել կանաչ ուժանիւթի յատկանիշները։
❖ Դատել թէ ուժանիւթի ո՛ր տեսակի օգտագործումը նախընտրելի է։
❖ Գտնել տուեալ նիւթին բանալի բառերուն թարգմանութիւնը օտար լեզուով։
❖ Կիրարկել հաւաստի աղբիւրներէ տեղեկութիւններ փնտռելու հմտութիւնը։
❖ Բանաւոր, արդիւնաւէտ ձեւով արտայայտել իր տեսակէտը։
Ամբողջ դասը և անոր կապուած յաւելուածները տեսնելու և ներբեռնելու համար անվճար արձանագրուէ՛ այս հարթակին։
